اخبار المحترفين رئيسية كورة افريقية كورة مصرية - أخرى

#كواليس_الكان| تلكس إلى .. كتيبة الفراعنة

إعلان

تلكس إلى هى خدمة يقدمها لكم موقع كورة11 كأول موقع رياضي عربي يوجه فيه رسائل سريعة إلى فريق بعد حدث رياضي كبير.

هيكتور كوبر .. أثبت للجميع أنك عبقري عن طريقة قراءتك الممتازة لكل مباراة عن التانية، كمل المشوار وهات البطولة .. محدش هيقولك انت سيميوني ولا أنشيلوتي .. كله هيفتكر أنك قدرت تصنع جيل جديد بشخصية جديدة قدرت تعيد الفراعنة على منصات التتويج من جديد.

عصام الحضري .. الكلام وحده غير كافي للإشادة بك، دايما بتثبت انك رمز وتهين كل من تسول له نفسه ويتحدث عن العمر كأرقام، سببت عقدة لدروجبا أحد أساطير تشيلسي والنهاردة جبت عقدة لموهبة تشيلسي الجديدة المزعج “بيرنارد تراوري” .

أحمد فتحي .. في أي مكان بتسد وبتجيد، أي نعم الحمل كان تقيل أوي النهاردة في مراقبتك لتراوري المزعج لكن بتسد باك يمين أو باك شمال أو خط وسط .. لولاك لكان كوبر في مأزق من بداية البطولة.

إعلان

علي جبر .. وزير الدفاع اللي شايل حمل كبير وبيلعب بمنتهى الفدائية والرجولة والتركيز .. مهما قلت وعدت .. مش هوفي حقك يا جبر.

أحمد حجازي .. الأسد المقاتل اللي بيشكل مع جبر حصن دفاعي قوي، مجهود بدني جبار وروح عالية ومش غريب عليك يا حجازي.

إعلان

أحمد المحمدي .. ناكولوما لاعب مزعج جدًا أنا عارف لكن بعد ما متعت الناس يا محمدي بالكباري متخليهمش يتخنقوا منك بسبب التحليق الوحش أوي النهاردة .. ده ميمنعش أنك راجل وسديت ونعول عليك في المباراة النهائية.

Untitled-1-Recovered

طارق حامد .. أسد وسط الملعب، بعد إصابة محمد النني، وإضطرار المنتخب للعب بأحمد فتحي في مركز الظهير الأيسر .. ما شاء الله عليك قافل نص الملعب بالضبة والمفتاح.

إبراهيم صلاح .. مش حلو أوي النهاردة يا هيما فنيًا لكن كإلتزام ورجولة دي جينات موجودة فيك وكلنا عارفين ده من زمان.

محمد صلاح .. هدف ولا أروع، متراقب أوي .. عارفين قيمتك، لكن كله كوم ونظرتك للكورة بعد تسجيلك ضربة الجزاء ليها مليون معنى ( لوم الحظ، الحمل الكبير اللي عليك بما أنك نجم الفريق، الإنتقادات المتوالية) .. لكل جيل نجم وأنت نجم الجيل يا صاروخ الشرق.

عبدالله السعيد .. أدائك كان مش كويس يا عبدالله النهاردة .. وختمته بتسديدة ضربة الجزاء اللي ضاعت، إحنا كلنا عارفين مين عبدالله صانع البسمة والسعادة .. مستنيين بصمتك الجميلة في النهائي.

تريزيجيه .. لازم اللجنة المنظمة للبطولة دلوقتي تاخد القرار بأنك أفضل لاعب في البطولة .. على الرغم من أداءك المتوسط النهاردة لكن ده ميمنع الروح القتالية والمجهود البدني الخيالي اللي بتقدمه في كل مباراة.

Untitled-10

كهربا .. أسيست جميل جدًا، لكن للأسف هنفتقدك في النهائي جدًا.

عمرو وردة .. لاعيب كبير وأمامك مستقبل باهر .. عليك ضغوط كبيرة للأسف لأنك مش معروف وفي دوري بالنسبة للمصريين دوري عادي “اليوناني” لكن الناس هتعرف قريب مين وردة.

رمضان صبحي .. منتخب مصر كان مفتقد للثقة قبل نزولك يا رمضونا، نزلت عملت كام حركة من حركاتك الجميلة خليت الثقة ترجع للولاد .. دورك كان تكتيكي ودهاء من الداهية كوبر.

عمر جابر .. نزولك فرحة لمصر كلها، متزعلش من الدكة .. مفيش حد كبير عليها، أنت مستقبل الجبهة اليمنى في مصر.

مروان محسن .. ناس كتير بتنتقد المهاجم لما مش بيجيب أجوان .. لكن مصر كلها عرفت قيمتك النهاردة ودورك الرائع مع المنتخب الوطني .

مصر